Kaliforniya üç il aktiv olmayan kriptoaktivlərin dövlətə ötürülməsinə icazə verdi

Kaliforniya Nümayəndələr Palatası tərəfindən qəbul edilən AB-1052 qanun layihəsi üç il ərzində aktiv olmayan və birjalarda saxlanılan kriptovalyutaların ştat tərəfindən “tələb olunmamış əmlak” kimi götürülməsinə icazə verir. Qanun kriptoicma daxilində geniş müzakirələrə səbəb olub. Satoshi Action Fund təşkilatının siyasət direktoru Erik Piterson məsələni izah edib.

Qanunvericiliyə əsasən, əgər kriptoaktiv sahibi üç il ərzində heç bir əməliyyat aparmayıb və ya hesabına daxil olmayıbsa, aktiv “tələb olunmamış” hesab edilə bilər və ştatın nəzarətinə verilə bilər. Lakin vacib məqam odur ki, aktivlər satılmayacaq və ləğv edilməyəcək.

Piterson bildirib ki, əgər bitcoin birjadan ştata ötürülərsə, o, satılmadan eyni formada saxlanılacaq və sahibi onu yenidən bitcoin şəklində geri ala biləcək.

Qanun layihəsi Palatada yekdilliklə (78 lehinə səs) qəbul edilib və indi Kaliforniya Senatında müzakirəyə çıxarılıb.

Sənəd artıq mövcud olan “tələb olunmamış əmlak” normalarını — bank hesabları və seyflər kimi — rəqəmsal aktivlərə də şamil edir. Qanun şəxsi açarların və ya cüzdanların dövlətə verilməsini tələb etmir; söhbət yalnız birjalar vasitəsilə aktivlərin saxlanmasından gedir.

Bəzi tənqidçilər bunu bitcoin-in mərkəzləşdirilməmiş təbiətinə təhlükə hesab etsələr də, hüquqşünaslar bildirirlər ki, oxşar qaydalar ABŞ-ın əksər ştatlarında artıq tətbiq olunur.

Kripto hüquqşünas Heyli Lennon qeyd edib ki, aktivlər sahibinin müraciətindən sonra geri qaytarılır.

Piterson vurğulayıb ki, aktivlərin kriptovalyuta formasında saxlanılması istifadəçilərə gələcəkdə qiymət artımından faydalanmaq imkanı yaradır.

Xatırladaq ki, ABŞ Nümayəndələr Palatası rəqəmsal aktiv bazarının strukturu ilə bağlı əsas qanun layihəsinin yenilənmiş mətnini dərc etməyə hazırlaşır.